ich sueche nüm, ich hange nüm
ich warte nüm, ich plange nüm
ich frög mi nüm, ich zwiifle nüm
ich hoffe nüm, es schliist mi nüm

ich bruuche nüt und vermisse nüt
erwarte nüt und vergisse nüt
ich plane nüm und stüüre nüm
bi min eigne beschte fründ

ich mache ein schritt
nach em andere
und es dunkt mi nüm so schwer
ich mache ein schritt
nach em andere
uf dem wäg zrugg zu mir

ich versinke nüm, ich liide nüm
ich trotze nüm und beniide nüm
ich versteck mi nüm, und truure nüm
ich brämse nüm und beduure nüm

mängisch schaffts mi no, mängisch bliib i schtoh
mängisch gib ich na, mängisch lah mi gah
doch ich belüg mi nüm und verschtrick mi nüm
allei sii isch nümm so schlimm

ich mache ein schritt
nach em andere
und es dunkt mi nüm so schwer
ich mache ein schritt
nach em andere
uf dem wäg furt vo dir

Ken tasseabdruck uf em neue chuchitisch
es kinoposter wo mal dis bild ghanget isch
sit du furt bisch gangi hindertsi fürsi
d'schpure verblassed, als wärsch nie do gsi

ich sueche nüm, ich hange nüm
warte nüm, plange nüm
vermisse nüt, beduure nüt
gange gli wider under d’lüt

ich mache ein schritt
nach em andere
und es dunkt mi nüm so schwer
ich mache ein schritt
nach em andere
uf dem wäg zrugg zu mir